Sinopsis
Logo dun «soño» sobre unha gardiá do bosque, Samuel, un mozo de 25 anos desmotivado coa vida adulta, lembra a historia que viviu de pequeno: un día encontrou unha aldeíña de gnomos en medio do bosque. Sempre ía alí xogar para tentar ver algún ser, ata que unha das veces que volveu a encontrou esnaquizada. Rescatou unhas poucas pezas que quedaban e a súa nai gardounas nun baúl no rocho.
Esa mañá, despois de tantos anos, decide baixar ao rocho na procura do baúl. Con el baixo o brazo, emprende unha camiñada cara ao bosque para ver as ruínas da aldea, desexando encontrar, polo menos, un indicio de que as habita algunha criatura. Cando xa o dá todo por perdido, atopa unha porta no tronco dunha vella árbore. Tras ela, aparece a aldea reconstruída e as luces comezan a acenderse.
